Liday, buteng, ken sennaay.

Dagitoy ti karirikna a naiyimprenta iti ruprupa dagiti residente ti Rehiyon Uno iti iduduprak ti Bagyo nga Egay.

Naruay a residente iti rehiyon, partikular iti Ilocos Norte ken Ilocos Sur, iti naminpinsan a napukawan ti pagtaengan ken ipatpateg iti biag gapu iti layus a ginubuay ti napigsa a tudo ken nakaro a saplit ti angin.

Imprastraktura, agrikultura, suplay ti danom, ken kuryente, kangrunaanna dagiti pagsapulan, iti nakaro a naapektaran.

Iti baet a saan a napakpakadaan ti nagbalin nga epekto ti bagyo, nagtalinaed a positibo dagiti umili gapu ti pannakaidanon iti nagduduma a serbisyo babaen kadagiti lokal a gobierno ken aksyon ti DSWD Uno.

Karaman kadagiti agtultuloy nga ipapaay ti ahensya para iti ibabangon manen dagiti residente     iti Rehiyon Uno ket ti pannakaidanon ti Family Food Packs, Non-food items agraman dagiti programa kas iti Assistance to Individuals in Crisis Situation (AICS) ken Emergency Cash Transfer (ECT).

Iti maysa nga interview ken ni DSWD Field Office 1 (FO 1) Regional Director Marie Angela S. Gopalan, inpetteng na a nakatutok ti ahensya para ti al-alisto a pannakaidanon iti umuna a tulong kadagiti agkasapulan.

Inpakaammo na a ti ahensya ket addaan ti komunikasyon kadagiti nagduduma a lider ti uppat a probinsya iti rehiyon tapno masaranay ti aniaman a kurang ken masapol dagiti masakupanda.

“Ang ating LGUs ang nagsisilbing first responder because they get the monitoring on their constituents. Pagkatapos, sa DSWD ay kami ang tuloy-tuloy na mag-offer ng assistance kung may request na augmentation ang LGUs upang maiparating ang dagdag na pangangailangan ng kanilang mga nasasakupan,” inbatad ni Director Gopalan.

Inlawlawag na a tapno awan ti agbalin a problema iti panagibunong ti tulong manipod iti ahensya ket napateg nga ipakat dagiti Municipal/City Social Welfare and Development Offices ken Provincial Social Welfare and Development Office ti husto a validation.

“Mayroong consultation ang DSWD with local social welfare officers at kailangan din na mayroong agad na reporting from barangays for validation,” innayun ni Director Gopalan.

Immuna nga inpakaammo ti regional director a kanayun nga adda ti koordinasyon ti Field Office iti Central Office tapno insegida a maaksyunan dagiti posible a panagkurang ti stockpile.

Iti kaudian a datos ti Disaster Response Management Division iti FO 1, addan 187,972 a food and non-food items ti naibunong ti DSWD Field Office 1 iti intero a Rehiyon ken adda metten ti 5,349 nga inisyal beneficiaries a naikkanen ti ECT.

Kabayatanna, 18,359 a benepisyaro ti naikkanen iti tulong pinansyal babaen iti AICS ken amin dagitoy ket manamnama a manayunan pay iti panagtultuloy ti awan sarday a serbisyo ti DSWD Field Office 1.

Pudno a #BawatBuhayMahalagaSaDSWD ken agnanayun a #DSWDUnoBuongPusongSerbisyo.

(by: Jesslyn Keith B. Valite, Information Officer I)