Nakaawat dagiti mannalon iti Tagudin, Ilocos Sur ti DSWD Cash-for-Work (CFW) nga agbalor iti PhP4,000.00. Nadumaduma a trabaho ti inaramid dagiti benepisyaryo iti las-ud ti 10 nga aldaw, kas iti declogging, dredging, panagtarimaan ken panagdalus iti kanal, panagmula iti kayo, ken communal gardening. Dagiti benepisyaryo nga mannalon ket apektado ti dry season wenno tagtuyot iti nasao nga ili.

Gapu iti pannakadadael iti irigasyon gapuanan ti Bagyong Maring idi 2021 nagresulta daytoy ti iregular nga suplay ti danum para kadagiti mannalon ti ili. Kimmaro daytoy gapu iti dry season nga nagresulta ti kaawan ti danum nga mausar dagiti mannalon.

Segun keni Alejo Fajardo, benepisyaryo iti DSWD CFW manipud Malacañang, Tagudin, Ilocos Sur, “dakkel nga tulong daytoy nga naawat mi nga pagnayon kadagiti masapol mi iti panagtalon kas ti abono ken krudo para ti panagpadanum kadagiti mulmula mi.”

“Malaksid kadagiti mausar ko idiay talon, makatulong met laeng daytoy nga CFW para iti panagadal dagiti apok. Agyaman kami iti DSWD Field Office 1 (FO 1) ta nagdakkel nga tulong daytoy kanyami nga mannalon.” kuna ni Onofre Lorenzana Sr. iti Magsaysay, Tagudin, Ilocos Sur. 

Segun ken ni Roque S. Verzosa Jr, Municipal Mayor ti Tagudin, Ilocos Sur, “amin a barangay ti Tagudin ket addaan iti mannalon, isu a dakkel a banag daytoy nga DSWD CFW. Para kadagiti mannalon, makatulong daytoy iti inda panagtalon ken kasta met ti gastosen da iti inaldaw.” “Agyaman kami iti DSWD FO 1 ta dakkel nga tulong daytoy haan laeng para kadagiti benepisyaryo nu diket pati iti ili ti Tagudin,” leppas na.

Ti CFW iti DSWD FO 1 ket maysa nga modalidad iti Disaster Response and Rehabilitation Program nga panggep mangipaay ti pansamantala a panggedan kadagiti mariribukan wenu displaced nga indibidwal babaen ti pannakipaset wenno panangisayangkat kadagiti proyekto ken aktibidad ti panagsagana, panangpabassit, panangpabaro wenno panangkissay iti peggad kadagiti komunidad. (by Henry J. Juyno, Information Officer II, Disaster Response Management Division-Disaster Response and Rehabilitation Section)